وہ باتیں تری وہ فسانے ترے
شگفتہ شگفتہ بہانے ترے
بس اک داغِ سجدہ مری کائنات
جبینیں تری آستانے ترے
بس اک زخمِ نظّارہ، حصہ مرا
بہاریں تری آشیانے ترے
فقیروں کا جمگھٹ گھڑی دو گھڑی
شرابیں تری بادہ خانے ترے
ضمیرِ صدف میں کرن کا مقام
انوکھے انوکھے ٹھکانے ترے
بہار و خزاں کم نگاہوں کے وہم
برے یا بھلے سب زمانے ترے
عدمؔ بھی ہے تیرا حکایت کدہ
کہاں تک گئے ہیں فسانے ترے
Pakistan Rupee Calculator