نگہت بٹ وفات 8 فروری

نکہت بٹ (پیدائش : 1948ء| وفات :8 فروری 2020ء) پاکستان کی ممتاز ٹی وی اداکارہ تھیں جنہوں نے بہت شہرہ آفاق ڈراموں میں اپنے جوہر دکھائے سرکاری ٹی وی ڈراموں سے شہرت پانے والی کچھ اداکارائیں ایسی ہیں جنہوں نے کیریکٹر ایکٹر خاص طور پر ماں کے کردار میں بہت شہرت حاصل کی۔ ان میں عرش منیر، عشرت جہاں، عذرا شیروانی، ذہین طاہرہ، عظمیٰ گیلانی اور خورشید شاہد کے نام لیے جا سکتے ہیں۔ لیکن نکہت بٹ کو بھی فراموش نہیں کیا جا سکتا جنہوں نے کئی دہائیوں تک اپنی فطری اداکاری کا جادو جگائے رکھا۔
1964ء میں جب سرکاری ٹی وی کا آغاز ہوا تو سٹیج کے بہت سے اداکاروں نے ٹی وی کا رخ کیا۔ ان میں محمد قوی خان، علی اعجاز، مسعود اختر اور دیگر کئی فنکاروں کے نام لیے جا سکتے ہیں۔ اداکار شکیل یوسف وہ واحد اداکار تھے جو پہلے ٹی وی میں آئے اور بعد میں ایس ایم یوسف نے انہیں اپنی فلم ’’ہونہار‘‘ میں کاسٹ کیا۔ نکہت بٹ کو ٹی وی ڈراموں سے زیادہ شہرت ملی۔ یہ وہ زمانہ تھا جب عظمیٰ گیلانی، خالدہ ریاست، عذرا شیروانی، عشرت جہاں اور ذہین طاہرہ کا طوطی بول رہا تھا۔ دوسرے اہم کرداروں میں روحی بانو، بشریٰ انصاری، غزالہ رفیق، عطیہ شرف اور مدیحہ گوہر اپنے فن کے جوہر دکھا رہی تھیں۔ نکہت بٹ کو کھلا میدان نہیں ملا۔ انہوں نے بڑی منجھی ہوئی اداکاراؤں کی موجودگی میں اپنے آپ کو منوایا۔ اس سے پہلے وہ سٹیج ڈراموں میں اپنی شناخت بنا چکی تھیں اور مسعود اختر، انور سجاد اور محمد قوی خان جیسے اداکاروں کے ساتھ کام کر چکی تھیں۔ نکہت بٹ نے کمال احمد رضوی اور رشید عمر تھانوی کے ساتھ بھی کام کی
نکہت بٹ کی خوبی
نکہت بٹ کی سب سے بڑی خوبی یہ تھی کہ وہ مکالموں کی ادائیگی اور چہرے کے تاثرات سے بہت کام لیتی تھیں۔ خاص طور پر المیہ کرداروں میں انہوں نے بڑی جاندار اداکاری کی۔ کیمرے کے سامنے کیسے کھڑا ہونا ہے اور کیسے بولنا ہے، اس حوالے سے وہ سب جانتی تھیں۔ سینئر ٹی اداکاروں کا ان کے بارے میں کہنا ہے کہ وہ شروع سے ہی اعتماد کی دولت سے مالامال تھیں اور ریکارڈنگ کے دوران کبھی گھبراہٹ کا شکار نہیں ہوئیں۔ وہ اپنے سے سینئر اداکاروں کا احترام اور جونیئر فنکاروں کی حوصلہ افزائی کرتی تھیں۔ انہوں نے اصغر ندیم سید، یونس جاوید اور امجد اسلام امجد کے کئی مشہور ڈراموں میں اپنی لاجواب اداکاری سے لاکھوں لوگوں کو متاثر کیا نکہت بٹ کے مشہور ترین ڈراموں میں ’’خواہش، پیاس، لنڈا بازار اور وارث‘‘ کے نام لیے جا سکتے ہیں
ذاتی زندگی
انہوں نے ٹی وی اور سٹیج کے معروف اداکار عابد بٹ سے شادی کی تھی جن کو پی ٹی وی کے معروف ڈرامے اندھیرا اجالا سے شہرت ملی تھی تاہم بعد ازاں انیہوں نے اداکاری ترک کر کے زندگی تبلیغ کے لیے وقف کر دی تھی ان کا انتقال 2016ء میں ہو گیا تھا
فنکاروں کے تاثرات
مسعود اختر کا کہنا ہے کہ نکہت بٹ اپنے وقت کی شاندار اداکارہ تھیں۔ محمد قوی خان کہتے ہیں کہ ابتدائی سالوں میں وہ سرکاری ٹی وی کا چہرہ تھیں اور انہوں نے ٹی وی کے کئی ڈراموں میں متاثر کن اداکاری کی۔ وہ ایک ذہین اداکارہ تھیں جو اپنے کردار میں ڈوب جایا کرتی تھیں۔ ان کے بارے میں یہ کہنا مناسب ہو گا کہ انہوں نے اداکاری کا ایک معیار قائم کیا۔ نکہت بٹ کے مشہور ترین ڈراموں میں ’’خواہش، پیاس، لنڈا بازار اور وارث‘‘ کے نام لیے جا سکتے ہیں۔ معروف شاعر اور ڈراما نگار اصغر ندیم سید نے کہا کہ نکہت بٹ بڑی باکمال اداکارہ تھیں جنہوں نے اپنے ہر کردار سے انصاف کیا۔ ان کا کہنا تھا کہ نکہت بٹ نے ان کی ڈراما سیریز ’’خواہش‘‘ اور ’’پیاس‘‘ میں اپنی فنی عظمت کے نقوش چھوڑے۔ انہوں نے کہا کہ جب وہ ٹی وی میں آئے تو 1986ء میں اپنی پہلی ڈراما سیریز ’’دریا‘‘ لکھی۔ جب ’’خواہش‘‘ اور ’’پیاس‘‘ لکھے تو نکہت بٹ ٹی وی ڈراموں کا ایک نمایاں نام تھا۔ وہ ایک ورسٹائل اداکارہ تھیں۔ انہوں نے طویل دورانیہ کے ڈراموں میں بھی کام کیا اور ڈراما سیریز میں بھی۔ انہوں نے پنجابی ڈراموں میں بھی کام کیا۔ ڈراما ’’پیاس‘‘ میں انہوں نے جاگیردارنی کا کردار بہت عمدہ طریقے سے ادا کیا۔ سرکاری ٹی وی ان کا گھر تھا۔ اصغر ندیم سید کا کہنا تھا کہ وہ دھیمے مزاج کی خاتون تھیں اور وقت کی بہت پابند تھیں۔ انہوں نے کہا کہ سرکاری ٹی وی کے ڈراموں میں کام کرنے سے عزت تو ملتی ہے لیکن اتنے زیادہ پیسے نہیں ملتے۔ بڑی مشکل سے دال روٹی چلتی ہے۔ یہی وجہ ہے کہ فنکاروں پر جب مشکل وقت آتا ہے تو پھر انہیں حکومت کی طرف دیکھنا پڑتا ہے۔ حکومت نے بھی کوئی فنڈ قائم نہیں کیا جہاں سے ان کی مدد کی جائے۔ ممتاز ڈراما نگار یونس جاوید کا کہنا تھا کہ وہ عابد بٹ کی بیوہ تھیں۔ دونوں میاں بیوی اداکاری کرتے تھے لیکن نکہت بٹ میں اداکاری کے جوہر زیادہ تھے اور انہوں نے ہر قسم کے کردار ادا کیے۔ انہوں نے کہا کہ نکہت بٹ پیدائشی آرٹسٹ تھیں۔ نکہت بٹ نے امجد اسلام امجد کی مشہور ڈراما سیریز ’’وارث‘‘ میں بھی بڑا اچھا کام کیا تھا۔ اس میں انہوں نے منور سعید کی بیوی کا کردار ادا کیا۔ دیگر اداکاروں کی طرح نکہت بٹ کی کارکرد گی کو اس ڈرامے میں پسند کیا گیا
وفات
8 فروری 2020ء کو نکہت بٹ 72 برس کی عمر میں لاہور میں انتقال کر گئیں۔ وہ طویل عرصے سے علیل تھیں اور معاشی تنگدستی کا بھی شکار تھیں۔