ورلڈکپ؛ کیوی بیٹرز نے پاکستانی اسپنرز کی درگت بناڈالی

نیوزی لینڈ نے ورلڈکپ سے قبل وارم اَپ میچ میں پاکستانی اسپنرز کی درگت بناڈالی۔

حیدرآباد کے راجیو گاندھی کرکٹ اسٹیڈیم میں کھیلے گئے 100 اوورز کے مقابلے میں تقریباً 700 کے قریب رنز کے انبار لگے جبکہ 11 وکٹیں دونوں ٹیموں کے بالرز کے ہاتھ لگیں۔

ابتدا میں پاکستانی بیٹرز مشکلات کا شکار نظر آئے تاہم کپتان بابراعظم اور رضوان نے بڑے اسکور کی بنیاد رکھی، بعدازاں سعود شکیل اور آغا سلمان نے بھی بہتی گنگا میں ہاتھ دھوئے۔

مزید پڑھیں: وارم اَپ میچ؛ قومی ٹیم کے بالرز 345 کا دفاع بھی نہ کرسکے

345 رنز کے ہدف کے تعاقب میں قومی بالرز ایک بار پھر حریف ٹیم کے کھلاڑیوں کو پویلین بھیجنے میں ناکام رہے جبکہ اسپن ڈیپارٹمنٹ بری طرح فلاپ نظر آیا، محمد نواز نے 7 اوورز میں 55، اسامہ میر نے 10 اوورز میں 68 جبکہ آغا سلمان نے 8 اوورز میں 60 رنز لٹائے۔

مجموعی طور پر اسپنرز نے 25 اوورز میں 183 رنز دیکر محض 3 کھلاڑیوں کو پویلین کی راہ دیکھائی۔

مزید پڑھیں: ورلڈکپ؛ ٹاپ فور چھوٹا ہدف ہے، فاتح ہوکر واپس آنا چاہتے ہیں، بابراعظم

دوسری جانب فاسٹ بولنگ کے شعبے میں بھی حارث رؤف اور محمد وسیم جونئیر کی خوب پٹھائی ہوئی جبکہ حسن علی نے ابتداء میں وکٹ لی تاہم کوئی بالر انکا ساتھ دینے میں ناکام رہا۔

اس میچ میں نائب کپتان شاداب خان، افتخار احمد اور فاسٹ بولر شاہین شاہ آفریدی کو آرام کروایا گیا تھا۔