ڈونلڈ ٹرمپ کی جیت پر راہل گاندھی کی مبارکباد، کملا ہیرس کے نام بھی پیغام

نئی دہلی: امریکی صدارتی انتخابات کے حالیہ نتائج میں ڈونلڈ ٹرمپ کی کامیابی پر دنیا بھر میں ردعمل ظاہر ہو رہا ہے۔ اسی تناظر میں لوک سبھا میں قائد حزب اختلاف کانگریس کے لیڈر راہل گاندھی نے ڈونلڈ ٹرمپ اور کملا ہیرس کے نام تہنیتی خطوط بھیجے ہیں۔ ڈونلڈ ٹرمپ کو دوبارہ صدر منتخب ہونے پر مبارکباد دیتے ہوئے راہل گاندھی نے ان کی قیادت میں ہندوستان اور امریکہ کے تعلقات میں مزید مضبوطی کی امید ظاہر کی ہے۔

راہل گاندھی نے ڈونلڈ ٹرمپ کے نام اپنے خط میں لکھا کہ ہندوستان اور امریکہ کے درمیان تاریخی دوستی جمہوری اقدار پر مبنی ہے۔ انہوں نے اس اعتماد کا اظہار کیا کہ ٹرمپ کی قیادت میں دونوں ممالک باہمی دلچسپی کے شعبوں میں تعاون کو فروغ دیں گے اور نئی راہیں کھلیں گی جو دونوں ملکوں کے عوام کے لیے مفید ثابت ہوں گی۔ راہل نے مزید کہا کہ ٹرمپ کے دوبارہ منتخب کر کے امریکی عوام نے ان کی قیادت پر اعتماد ظاہر کیا ہے۔

راہل گاندھی نے کملا ہیرس کو بھی خط تحریر کیا ہے، حالانکہ وہ صدراتی انتخابات میں شکست کھا چکی ہیں۔ اپنے خط میں راہل گاندھی نے نائب صدر کی حیثیت سے ہیرس کی خدمات کو سراہا اور ان کی کوششوں کو یاد کیا۔ انہوں نے لکھا کہ بائیڈن انتظامیہ کے دوران ہیرس نے عالمی مسائل پر تعاون کو فروغ دینے میں اہم کردار ادا کیا۔ راہل نے ان کے اتحاد کے پیغام اور عوام کو یکجا کرنے کی کوششوں کو سراہتے ہوئے کہا کہ نائب صدر کے طور پر ان کا کردار ہمیشہ یاد رکھا جائے گا۔

راہل گاندھی کی جانب سے ان خطوط میں امریکی تعلقات کے لیے ہندوستان کے عزم کی جھلک ملتی ہے۔ ہندوستان اور امریکہ کے درمیان تعلقات کو جمہوری اقدار اور عالمی مسائل پر تعاون کے تناظر میں اہم سمجھا جاتا ہے اور یہ خطوط اس تعلق کو مزید مضبوط کرنے کی عکاسی کرتے ہیں۔