فوٹو: سیکرٹری داخلہ خرم آغا اسلام آباد میں یادگار شہداء پر گلدستہ رکھ رہے ہیں
کراچی: پولیس کے شہید افسران اوراہلکاروں کو خراج عقیدت پیش کرنے کیلئے ملک بھرمیں بھی یوم شہدائے پولیس منایا جارہا ہے۔
یوم شہدائے پولیس کی مناسبت سے ملک کے مختلف شہروں میں تقاریب منعقد ہوئیں جس میں ملک کی داخلی سلامتی کی خاطر اپنی جانوں کا نذرانہ پیش کرنے والے پاکستان پولیس کے بہادر جوانوں اور افسران کو خراج عقیدت پیش کیا گیا۔
صدر مملکت آصف علی زرداری، وزیراعظم شہباز شریف کی جانب سے جاری پیغامات میں پولیس شہداء کو خراج عقیدت کیا گیا۔
وزیراعظم شہباز شریف نے کہا کہ یوم شہدائے پولیس ، بہادر پولیس افسران اور اہلکاروں کی جرات اور بہادری کو یاد کرنے کا دن ہے۔
صدر مملکت آصف زرداری نے کہا کہ قوم کیلئے جانوں کا نذرانہ پیش کرنے والے پولیس کے اہلکاروں کی بے مثال جرات اور قربانیوں کو خراج تحسین پیش کرتے ہیں۔
لاہور:
پولیس ٹریننگ کالج لاہور میں یوم شہداء پولیس کی مرکزی تقریب کا انعقاد کیا گیا جس میں آئی جی پنجاب ڈاکٹر عثمان انور کی بطور مہمان خصوصی شرکت کی۔
کالج آڈیٹوریم میں منعقدہ پروگرام میں شہدائے پولیس کے اہل خانہ کی بڑی تعداد بھی شریک تھی، آئی جی پنجاب ڈاکٹر عثمان انور نے بہترین تعلیمی کارکردگی کے حامل شہدا پولیس کے بچوں میں 65 لیپ ٹاپس تقسیم کئے۔
شہدا پولیس کے بچوں کی بائیسکلز سمیت دیگر تحائف سے حوصلہ افزائی کی گئی۔ شہداء پولیس کے بچوں اور اہلخانہ نے شہدا کی یاد میں نظمیں اور ٹربیوٹ مضامین پیش کئے۔ آئی جی پنجاب ڈاکٹر عثمان انور نے شہداء پولیس کی لازوال قربانیوں کو شایان شان خراج تحسین پیش کیا۔
راولپنڈی/ اسلام آباد:
راولپنڈی میں یوم شہداء پولیس کے موقع پر یادگار شہداء پر پُروقار تقریب کا انعقاد کیا گیا جس میں آر پی او بابر سرفراز الپا، سی پی او سید خالد ہمدانی، سمیت سینئر افسران سمیت شہداء پولیس کے عزیز واقارب نے شرکت کی، سینئرافسران اور پولیس کے چاق و چوبند دستے نے سلامی پیش کی۔
اسلام آباد میں یادگار شہداء پولیس لائنز میں پولیس کے چاک و چوبند دستے نے سلامی پیش کی۔ سیکرٹری داخلہ خرم آغا نے یادگار شہداء پر پھولوں کی چادر چڑھائی، ڈی آئی جی اسلام آباد سید علی رضا، ڈی آئی جی سکیورٹی جواد طارق و دیگر پولیس افسران بھی موجود تھے جبکہ سلامی میں شہداء کی فیمیلیز کو خصوصی طور پر مدعو کیا گیا تھا۔
اسلام آباد میں موٹر وے پولیس ہیڈ کواٹر میں بھی خصوصی تقریب کا انعقاد کیا گیا جس میں سینئر افسران و ملازمان، شہداء کے ورثاء اور موٹروے پولیس کے شہید سب انسپکٹر محمد امین کے صاحبزادے اے ایس پی صہیب امین نے بطور مہمان خصوصی تقریب میں شرکت کی۔
انسپکٹر جنرل سلمان چوہدری نے شہداء کے ورثاء کا بطور مہمان خصوصی تقریب میں استقبال کیا۔ تقریب میں موٹروے پولیس اور دیگر قانون نافذ کرنیوالے اداروں کے شہداء کو خراج تحسین پیش کیا گیا۔
کراچی:
ڈی آئی جی ٹریفک کراچی احمد نواز نے یوم شہدائے پولیس کے موقع پر یادگار شہداء پر حاضری دی، پھولوں کی چادر چڑھائی اور فاتحہ خوانی کی، پولیس کے چاق و چوبند دستے نے یاد گار شہداء پر سلامی دی۔
کوئٹہ:
وزیراعلیٰ بلوچستان میر سرفراز بگٹی نے سینٹرل پولیس آفس کوئٹہ میں یادگار شہداء پر حاضری دی اور پھول چڑھائے، وزیراعلیٰ نے سینٹرل پولیس آفس کوئٹہ میں یوم شہدائے پولیس کی مناسبت سے منعقدہ تقریب سے خطاب کرتے ہوئے کہا کہ آج ہم ان تمام شہداء کو خراج عقیدت پیش کرتے ہیں کہ جنہوں نے اس صوبے کی امن کی خاطر اپنی جانوں کے نذرانے پیش کئے، حکومت شہداء کے خاندانوں کو مکمل تعاون فراہم کرے گی۔
تقریب میں ڈپٹی اسپیکر صوبائی اسمبلی بلوچستان غزالہ گولا، صوبائی وزراء راحیلہ حمید درانی، بخت محمد کاکڑ ، چیف سیکرٹری بلوچستان شکیل قادر خان، ایڈیشنل چیف سیکرٹری داخلہ زاہد سلیم، ائی جی پولیس بلوچستان عبدالخالق شیخ، اور آئی جی ایف سی نارتھ سمیت شہداء کے لواحقین نے شرکت کی۔