30 لوگوں کو ہلدوانی لے جا رہی بس 1500 فیٹ گہری کھائی میں گری، ایک بچہ سمیت کم از کم 4 لوگوں کی موت

اتراکھنڈ کے کماؤں ڈویژن واقع بھیم تال میں آج دردناک سڑک حادثہ پیش آیا جس میں کم از کم 4 لوگوں کی موت ہو گئی ہے۔ الموڑا سے ہلدوانی جا رہی روڈویز بس بھیم تال-رانی باغ موٹر وے کے آمڈالی کے پاس بے قابو ہو کر تقریباً 1500 فیٹ گہری کھائی میں جا گری جس سے وہاں پر چیخ و پکار والی حالت پیدا ہو گئی۔ فوری طور پر وہاں موجود لوگوں نے ریسکیو مہم شروع کی اور مقامی انتظامیہ بھی اس حادثہ کی خبر ملتے ہی سرگرمی کے ساتھ راحت و بچاؤ کام میں مصروف ہو گئی۔

میڈیا رپورٹس کے مطابق بس میں تقریباً 30 مسافر تھے اور جب بس کھائی میں گری تو کئی مسافر چھٹک کر اِدھر اُدھر گر گئے۔ ابھی تک جن 4 لوگوں کی ہلاکت سے متعلق خبریں سامنے آئی ہیں، ان میں ایک بچہ اور 2 خواتین بھی شامل ہیں۔ اِدھر اُدھر گر کر زخمی ہوئے لوگوں کو کسی طرح اوپر لایا گیا اور پھر علاج کے لیے قریبی اسپتال میں داخل کرایا گیا۔ زخمیوں میں کچھ کی حالت سنگین بتائی جا رہی ہے۔

حادثہ کی خبر ملتے ہی پولیس و انتظامیہ کے افسران جائے وقوع پر پہنچ گئے۔ زخمیوں کو رسّی اور کندھوں پر رکھ کر پولیس اور مقامی لوگوں کی مدد سے سڑک پر لایا گیا۔ پھر انھیں سی ایچ سی بھیم تال لے جایا گیا جہاں فوری طور پر ان کا علاج شروع ہوا۔ سرگرمی دکھاتے ہوئے 15 ایمبولنس ہلدوانی بھیجا گیا ہے اور بڑے پیمانے پر راحت و بچاؤ کاری کا عمل جاری ہے۔

ایس پی سٹی نینی تال ڈاکٹر جگدیش چندر نے بتایا کہ زخمیوں کو علاج کے لیے ہایر سنٹر ہلدوانی بھیجا گیا ہے۔ نینی تال پولیس اور راحت و بچاؤ کاری میں شامل اہلکاروں نے اب تک 24 زخمی مسافروں کو بحفاظت اسپتال پہنچا دیا ہے۔