کانگریس حکومت آنے پر ہر گھر میں صاف پینے کا پانی فراہم کرنے اور غیر قانونی کالونیوں کو باقاعدہ کرنے کا وعدہ

نئی دہلی: دہلی پردیش کانگریس کمیٹی کے صدر دیویندر یادو کی قیادت میں دہلی نیائے یاترا کے تیسرے مرحلے کا 17واں دن امبیڈکر اسمبلی حلقہ میں شروع ہوا۔ یاترا کا آغاز جے بلاک، دکشن پوری سے ہوا اور یاترا کے دوران لوگوں میں ایک نئی اُمید پیدا ہوئی کہ کانگریس دہلی کی تقدیر بدل کر عوام کے ساتھ ترقی اور فلاحی کام کرے گی۔

دیویندر یادو نے یاترا کے دوران عوام کے مسائل سنے اور انہیں یقین دلایا کہ کانگریس کی حکومت آنے پر دہلی کا چہرہ بدل دیا جائے گا اور غریبوں، دلتوں اور بے گھر افراد کی حالت بہتر کی جائے گی۔ انہوں نے مختلف سڑکوں پر لوگوں سے بات کی اور صفائی کارکنوں کے ساتھ جھاڑو بھی لگائی۔ ساتھ ہی ایک پوڑی بیچنے والے کو مستقل اسٹال دینے کا وعدہ کیا۔

یادو نے کہا کہ کانگریس نے 2007 میں غیر قانونی کالونیوں کو باقاعدہ کرنے کا عمل شروع کیا تھا لیکن مودی حکومت نے اس پر کوئی خاطر خواہ کام نہیں کیا۔ 2019 میں وزیراعظم نے 40 لاکھ لوگوں کو مالکانہ حقوق دینے کا وعدہ کیا تھا مگر پانچ سالوں میں صرف 25000 لوگوں کو مالکانہ حقوق ملے ہیں۔ یادو نے مزید کہا کہ کانگریس نے 2007 میں جے این این یو آر ایم مشن کے تحت شہری غریبوں کے لیے گھر بنانے کا عمل شروع کیا تھا، مگر مودی حکومت نے ان گھروں کو کرایے کی اسکیم میں شامل کرنے کا فیصلہ کیا جس سے غریبوں کو ان گھروں کا فائدہ نہیں مل سکا۔

دیویندر یادو نے کہا کہ کانگریس کی مرکز کی حکومت نے 2014 میں تقریباً 8 لاکھ شہری غریبوں کے تحفظ اور روزگار کے لیے اسٹریٹ وینڈر ایکٹ 2014 متعارف کرایا تھا، لیکن مودی حکومت نے اس پر کوئی عمل نہیں کیا۔ دہلی نیائے یاترا میں کانگریس کی حمایت میں عوام کی بھرپور شرکت سے یہ واضح ہو رہا ہے کہ دہلی کے لوگ کانگریس کو ایک نئی امید کے طور پر دیکھ رہے ہیں اور وہ تبدیلی کے لیے تیار ہیں۔