پرندوں کی دنیا کا درویش ہوں میں

کیا میں نے اس خاکداں سے کنارا
جہاں رزق کا نام ھے آب و دانہ

بیاباں کی خلوت خوش آتی ھے مجھ کو
ازل سے ھے فطرت میری راہبانہ

نہ باد بہاری، نہ گل چیں ، نہ بلبل
نہ بیماریء نغمہ ء عاشقانہ

خیابانیوں سے ھے پرہیز لازم
ادائیں ہیں ان کی بہت دلبرانہ

ہواءے بیاباں سے ہوتی ھے کاری
جوانمرد کی ضربت غازیانہ

حمام و کبوتر کا بھوکا نہیں میں
کہ ہے زندگی باز کی زاھدانہ

جھپٹنا، پلٹنا، پلٹ کر جھپٹنا
لہو گرم رکھنے کا ہے اک بہانہ

یہ پورب، یہ پچھم، چکوروں کی دنیا
مرا نیلگوں آسماں بیکرانہ

پرندوں کی دنیا کا درویش ہوں میں
کہ شاہیں بناتا نہیں آشیانہ

*(کلام: علامہ اقبال)*
*(پیشکش: سید شہاب الدین)*