مہاراشٹر اور جھارکھنڈ اسمبلی انتخابات کے نتائج کل ہوں گے برآمد، کانگریس نے کی مبصرین کی تقرری

مہاراشٹر اور جھارکھنڈ میں ہوئے اسمبلی انتخابات کے بعد اب سبھی کو 23 نومبر یعنی کل کا انتظار ہے جب ووٹوں کی گنتی ہوگی۔ اس سے ٹھیک ایک دن قبل کانگریس نے دونوں ریاستوں میں ووٹوں کی گنتی پر نظر رکھنے کے لیے اپنے مبصرین کی تقرری کر دی ہے۔ جمعہ کے روز کانگریس نے ایک نوٹیفکیشن جاری کر اس سلسلے میں جانکاری دی۔

کانگریس جنرل سکریٹری کے سی وینوگوپال کے دستخط سے یہ نوٹیفکیشن جاری کیا گیا ہے۔ اس کے مطابق پارٹی نے راجستھان کے سابق وزیر اعلیٰ اشوک گہلوت، چھتیس گڑھ کے سابق وزیر اعلیٰ بھوپیش بگھیل اور ڈاکٹر جی. پرمیشور کو مہاراشٹر میں انتخابی نتائج پر نظر رکھنے کے لیے مبصر مقرر کیا ہے۔ علاوہ ازیں طارق انور، ملّو بھٹی وکرمارک اور کرشنا الّاورو کو جھارکھنڈ کا مبصر مقرر کیا گیا ہے۔

کانگریس جنرل سکریٹری کے سی وینوگوپال کے ذریعہ جاری نوٹیفکیشن میں لکھا گیا ہے کہ ’’کانگریس صدر ملکارجن کھڑگے نے ان لیڈروں کو مبصر کے طور پر مقرر کیا ہے، جو فوری اثر سے انتخاب کے بعد کی حالت پر نظر رکھنے کے لیے مہاراشٹر اور جھارکھنڈ جائیں گے۔‘‘

قابل ذکر ہے کہ جھارکھنڈ میں 81 اسمبلی سیٹوں پر 2 مراحل میں ووٹ ڈالے گئے تھے۔ پہلے مرحلہ میں 13 نومبر کو 43 اسمبلی سیٹوں پر اور 20 نومبر کو دوسرے و آخری مرحلہ میں 38 سیٹوں پر ووٹنگ ہوئی تھی۔ دوسری طرف مہاراشٹر کی سبھی 288 اسمبلی سیٹوں پر ایک ہی مرحلہ میں 20 نومبر کو ووٹ ڈالے گئے تھے۔ دونوں ریاستوں کے انتخابی نتائج کا اعلان 23 نومبر کو ہوگا۔ ووٹوں کی گنتی صبح 8 بجے سے شروع ہو جائے گی۔