این آر سی میں درخواست نہ دینے والوں کو آدھار کارڈ جاری نہیں ہوگا

نئی دہلی: آسام میں این آر سی کے معاملے پر ایک اہم فیصلہ لیتے ہوئے، ریاستی حکومت نے واضح کیا ہے کہ جو لوگ این آر سی (نیشنل رجسٹر آف سٹیزنز) کے لیے درخواست نہیں دیں گے، انہیں آدھار کارڈ جاری نہیں کیا جائے گا۔ یہ اعلان وزیر اعلیٰ ہمنتا بسوا سرما نے کابینہ کی میٹنگ کے بعد کیا۔

وزیر اعلیٰ نے کہا کہ اگر کسی فرد یا اس کے خاندان نے این آر سی کے لیے درخواست نہیں دی تو اس کا آدھار کارڈ کے لیے کیا گیا درخواست مسترد کر دیا جائے گا۔ یہ فیصلہ بنگلہ دیشی دراندازوں کو روکنے کے لیے کیا گیا ہے، جن کی سرگرمیاں ریاست کے لیے خطرہ بن رہی ہیں۔

وزیر اعلیٰ سرما نے کہا کہ گزشتہ دو ماہ میں آسام پولیس، تریپورہ پولیس اور بی ایس ایف نے دراندازی کی کئی کوششوں کو ناکام بنایا ہے۔ انہوں نے کہا، ’’بنگلہ دیش سے ہونے والی دراندازی ایک سنگین مسئلہ ہے، جسے روکنے کے لیے ہمیں اپنے نظام کو مضبوط بنانا ہوگا۔‘‘ اس کے تحت آدھار کے عمل کو سخت کیا جا رہا ہے۔

کابینہ اجلاس کے بعد اعلان کیا گیا کہ آدھار درخواست دہندگان کی جانچ جنرل ایڈمنسٹریشن ڈیپارٹمنٹ کرے گا۔ ہر ضلع میں ایڈیشنل ڈسٹرکٹ کمشنر کو یہ ذمہ داری دی گئی ہے۔ یو آئی ڈی اے آئی (یونیک آئیڈنٹفکیشن اتھارٹی آف انڈیا) ابتدائی درخواستیں ریاستی حکومت کو جانچ کے لیے بھیجے گی، جہاں سرکل آفیسر یہ تصدیق کرے گا کہ درخواست دہندہ یا اس کے اہل خانہ نے این آر سی کے لیے درخواست دی ہے یا نہیں۔

یہ اصول مرکزی حکومت کے ملازمین پر لاگو نہیں ہوں گے۔ ایس او پی کے مطابق، جمع کیے گئے دستاویزات کی جانچ کے بعد، 45 دنوں کے اندر انہیں یو آئی ڈی اے آئی کو آن لائن واپس بھیج دیا جائے گا۔ قابل ذکر ہے کہ این آر سی کی آخری رپورٹ 31 اگست 2019 کو جاری کی گئی تھی، جس میں 1906657 افراد کو خارج کر دیا گیا تھا۔ کل 33027661 درخواست دہندگان میں سے 31121004 کے نام شامل کیے گئے تھے۔