کراچی؛ گزری قبرستان کے قریب ڈاکو کی فائرنگ سے پولیس اہلکار زخمی

گزری قبرستان کے قریب پولیس مقابلے میں ڈاکوؤں کی فائرنگ سے پولیس اہلکار زخمی ہوگیا جبکہ ڈاکو موقع پر اپنی موٹر سائیکل چھوڑ کر فرار ہونے میں کامیاب ہوگئے۔

اس حوالے سے ترجمان کراچی پولیس کا کہنا ہے کہ گزری پولیس کا موٹر سائیکل سوار ڈاکوؤں سے مقابلہ ہوا جس میں دو طرفہ فائرنگ کے تبادلے میں پولیس اہلکار گولی لگنے سے زخمی ہوگیا جبکہ ڈاکو موقع سے اپنی موٹر سائیکل چھوڑ کر فرار ہونے میں کامیاب ہوگئے۔

پولیس نے موٹر سائیکل اپنے قبضے میں لیکر تھانے منتقل کر دی جبکہ زخمی پولیس اہلکار زین ولد عبدالمجید کو فوری طبی امداد کے لیے جناح اسپتال پہنچایا گیا ہے۔

پولیس ڈاکوؤں کے فرار ہونے والے راستوں پر نصب کلوز سرکٹ کیمروں کو تلاش کر رہی ہے جن کی فوٹیجز کی مدد سے ڈاکوؤں کی شناخت میں مدد مل سکے گی۔