رجب طیب اردوان پاکستان کے سچے اور مخلص دوست ہیں، صدر مملکت

 اسلام آباد: صدر مملکت آصف علی زرداری نے کہا ہے کہ ترک صدر رجب طیب اردوان پاکستان کے سچے اور مخلص دوست ہیں جہنوں نے میرے انتخاب اور رمضان المبارک کے آغاز پر ٹیلی فونک کال کی۔

ان خیالات کا اظہار صدر مملکت آصف علی زرداری نے ترک بری افواج کے کمانڈر کو نشان امتیاز ملٹری کا اعزاز عطا کرنے کی خصوصی تقریب میں کیا۔

صدر مملکت نے ایوارڈ پاکستان اور ترکی کے درمیان دفاعی تعلقات مضبوط بنانے میں خدمات کے اعتراف میں دیا جس کے بعد ترک فوج کے کمانڈر سے اُن کی ملاقات بھی ہوئی جس میں چیف آف آرمی اسٹاف جنرل سید عاصم منیر بھی شریک تھے۔

ملاقات میں دونوں برادر ممالک کے درمیان دفاعی تعاون سے متعلق امور پر تبادلہ خیال کیا گیا جبکہ پاکستان اور تریکی کے باہمی مفادات میں دو طرفہ تعلقات کو مزید وسعت دینے کی ضرورت پر زور دیا گیا۔

صدر آصف علی زرداری نے کہا کہ پاکستان ترکیہ کے ساتھ اپنے تعلقات پر فخر کرتا ہے، ترکی نے ہمیشہ بنیادی مسائل پر پاکستان کی حمایت کی ہے۔

صدر مملکت نے پاکستان اور ترکیہ کے درمیان متعدد منصوبوں میں دو طرفہ تعاون پر اطمینان کا اظہار کرتے ہوئے عوام کو مزید قریب لانے کے لیے روابط بڑھانے کی ضرورت پر زور دیا۔

آصف علی زرداری نے کہا کہ ترکیہ کے ساتھ زراعت، تعلیم، فن اور ثقافت کے شعبوں میں تعاون کو فروغ دینا ہوگا۔ انہوں نے کہا رجب طیب اردوان پاکستان کے سچے اور مخلص دوست ہیں، انہوں میرے انتخاب اور رمضان المبارک کے آغاز پر ٹیلی فونک کال کی اور دونوں کالز میں پاک ترک تعلقات کو وسعت دینے کے عزم کا اظہار کیا۔

ترک بری افواج کے کمانڈر نے پاکستان کے ساتھ دفاعی تعاون مزید بہتر بنانے کی خواہش کا اعادہ کیا اور کہا کہ دونوں ممالک علاقائی امن و استحکام کے فروغ میں نمایاں کردار ادا کر سکتے ہیں۔

اس موقع پر صدر مملکت نے ترک لینڈ فورسز کے کمانڈر کو نشان امتیاز (ملٹری) ملنے پر مبارکباد دی اور امید ظاہر کی کہ ترک فوج کے کمانڈر دونوں ممالک کے درمیان دفاعی تعاون کو مزید مضبوط بنانے میں اپنا کردار ادا کریں گے۔