حنا خان نے عمرہ کی سعادت حاصل کر لی، مکمل شفا عطا کرنے کی اللہ سے دعا مانگی

ٹی وی کی مشہور اداکارہ حنا خان ان دنوں اپنی صحت کا خاص خیال رکھ رہی ہیں۔ وہ بریسٹ کینسر کے تیسرے اسٹیج میں ہیں۔ حنا کو جب سے پتہ چلا ہے کہ انہیں چھاتی کا کینسر ہوا ہے تب سے وہ سوشل میڈیا پر کافی فعال ہیں اور اپنے علاج کے سفر کو اپنے فینس کے ساتھ شیئر کرتی رہتی ہیں۔

اس درمیان رمضان المبارک کے پاک مہینے میں حنا خان بھی عبادت کرتی ہوئی نظر آ رہی ہیں۔ وہ اپنی بیماری کے بیچ عمرہ کرنے کے لیے مکہ پہنچیں۔ جہاں انہوں نے اپنے بھائی کے ہمراہ عمرہ کی سعادت حاصل کی۔ اداکارہ نے عمرہ ادائیگی کے دوران کی تصاویر اور ویڈیوز اپنے آفیشل انسٹاگرام اکاؤنٹ سے شیئر کیں۔ شیئر کی گئیں ویڈیوز میں دیکھا جا سکتا ہے کہ وہ خانہ کعبہ کا طواف کر رہی ہیں۔ کچھ تصویروں میں حنا خان گرین آؤٹ فٹ میں ملبوس مقدس مقام پر کھڑی نظر آئیں۔۔

تصویروں اور ویڈیوز کو شیئر کرتے ہوئے حنا خان نے اس کے کیپشن میں لکھا ہے، “الحمد اللہ عمرہ 2025۔ مجھے بلانے کے لیے اللہ کا شکریہ۔ میرے پاس کہنے کے لیے لفظ نہیں ہیں۔ اللہ مجھے مکمل شفا عطا فرمائے۔ آمین۔”

قابل ذکر ہے کہ کچھ دنوں قبل حنا خان نے اپنے کیموتھیراپی کے سبب ناخن پر پڑے اثر کے بارے میں بات کی تھی۔ دراصل کچھ لوگوں نے اداکارہ سے پوچھا تھا کہ کیا انہوں نے نیل آرٹ کروایا ہے۔ اس پر اداکارہ نے ایک پوسٹ کے ذریعہ بتایا تھا کہ کیموتھیراپی کی وجہ سے ان کے ناخن ڈرائی ہو گئے ہیں اور کبھی کبھی یہ اُکھڑ بھی جاتے ہیں۔