شاہدرہ کے ضلع مجسٹریٹ نے کیجریوال کا دعویٰ کیا خارج، 11 ہزار کی جگہ محض 494 ووٹرس کا نام کاٹنے کی ملی درخواست

دہلی کے سابق وزیر اعلیٰ اور عآپ کنوینر اروند کیجریوال نے شاہدرہ اسمبلی سیٹ پر تقریباً 11 ہزار ووٹرس کا نام لسٹ سے کاٹے جانے کا جو دعویٰ کیا تھا، اسے شاہدرہ کے ضلع مجسٹریٹ نے خارج کر دیا ہے۔ سوشل میڈیا پلیٹ فارم ’ایکس‘ پر ضلع مجسٹریٹ نے بتایا کہ شاہدرہ اسمبلی حلقہ میں 29 اکتوبر سے اب تک محض 494 فارم-7 موصول ہوئے ہیں۔ یعنی محض 494 ووٹرس کے نام کاٹنے کی درخواست دی گئی ہے۔ اس پوسٹ کو ضلع مجسٹریٹ نے سی ای او دہلی اور الیکشن کمیشن کو بھی ٹیگ کیا ہے۔

دراصل جمعہ کے روز کیجریوال نے بی جے پی پر شاہدرہ علاقہ کے ووٹرس کے نام ووٹر لسٹ سے کٹوانے کا الزام عائد کیا تھا۔ کیجریوال نے کہا تھا کہ ’’بی جے پی نے شاہدرہ سیٹ پر ایک مہینے میں 11018 ووٹ کٹوانے کے لیے درخواست دی ہے۔‘‘ یہ دعویٰ انھوں نے ایک پریس کانفرنس کے دوران کیا تھا۔ اس دوران کیجریوال نے شاہدرہ اسمبلی حلقہ کا ڈاٹا بھی دکھایا تھا اور اپنی بات کو سچ ثابت کرنے کی کوشش کی تھی۔

اس معاملے میں دہلی بی جے پی کے صدر ویریندر سچدیوا نے کیجریوال پر جوابی حملہ کیا تھا۔ اب شاہدرہ کے ضلع مجسٹریٹ نے بھی کیجریوال کے دعووں کو غلط قرار دے دیا ہے۔ ’ایکس‘ پر کیے گئے پوسٹ میں شاہدرہ کے ضلع مجسٹریٹ نے لکھا ہے کہ ’’شاہدرہ اسمبلی حلقہ میں 29 اکتوبر 2024 سے اب تک صرف 494 فارم-7 موصول ہوئے ہیں۔ اس لیے یہ دعویٰ کہ بی جے پی کی جانب سے گزشتہ ایک ماہ میں 11018 فارم-7 داخل کیے گئے ہیں، حقیقتاً غلط ہے۔‘‘