تھائی لینڈ اور ملیشیا میں زبردست سیلاب، 12 افراد ہلاک، ہزاروں بے گھر

جنوبی تھائی لینڈ اور شمالی ملیشیا میں شدید سیلاب نے تباہی مچادی ہے۔ موسلا دھار بارشوں اور سیلاب کی وجہ سے دونوں ممالک کے ہزاروں افراد کی زندگیوں پر گہرا اثر پڑا ہے۔ خبر رساں ایجنسی ’رائٹرز‘ کے مطابق، 30 نومبر تک سیلاب کے نتیجے میں 12 افراد ہلاک ہو چکے ہیں۔ کئی علاقوں میں پانی گھروں میں داخل ہو چکا ہے، جس کے باعث لوگوں کو محفوظ مقامات پر منتقل کر دیا گیا ہے۔ آفات سے بچاؤ اور بحالی کے محکمہ کے مطابق، جنوبی تھائی لینڈ میں شدید سیلاب نے تقریباً 534,000 گھروں کو متاثر کیا ہے۔ جمعہ (29 نومبر) تک مرنے والوں کی تعداد 9 تھی۔ متاثرہ علاقوں میں ہزاروں افراد 200 عارضی ریلیف کیمپوں میں پناہ لینے پر مجبور ہیں۔

صوبہ سونگکھلا کے چانا ضلع میں آنے والے شدید سیلاب نے 50 سال کا ریکارڈ توڑ دیا ہے۔ انٹرنیٹ پر وائرل ہونے والے سیلاب کی کئی ویڈیو فوٹیج میں سیلاب کی شدت کو دیکھا گیا ہے۔ جن میں لوگوں کو ٹرکوں پر گھروں سے باہر نکالا جا رہا ہے کیونکہ ان کے گھر سیلابی پانی میں ڈوب گئے ہیں۔ جبکہ ایک ویڈیو میں یالا صوبے کے ستینگ نوکو ضلع میں امدادی کارکن سیلاب سے متاثرہ مکان کی چھت سے ایک بچے کو نکالتے ہوئے بھی نظر آ رہے ہیں۔

نیشنل ڈیزاسٹر کنٹرول سینٹر نے کہا کہ تھائی لینڈ کے پڑوسی ملک ملیشیا میں آنے والے شدید سیلاب سے 9 ریاستوں کے تقریباً 139000 لوگ متاثر ہوئے ہیں۔ جمعہ (29 نومبر) تک یہاں 3 لوگوں کی موت ہو چکی ہے۔ تھائی لینڈ کے پڑوسی ملک فلپائن کو صرف نومبر کے مہینے میں 6 سمندری طوفانوں کا سامنا کرنا پڑا تھا۔ جس کیوجہ سے فلپائن میں بڑے پیمانے پر تباہی مچی تھی۔