کانگریس کا وزیر اعظم مودی پر حملہ، ’منی پور کے عوام کو نظر انداز کرنا ناقابل قبول‘

جے رام رمیش نے ایکس پر لکھا، ’’اگلے تین دنوں تک ہم غیر حیاتیاتی وزیر اعظم کے تیز رفتار جھوٹ اور غیر شائستہ انتخابی مہم سے محفوظ رہیں گے۔ وہ ایک بار پھر بیرونِ ملک دورے پر جا رہے ہیں، جہاں وہ کسی حکمرانی کی مہارت یا عظمت کا مظاہرہ کرنے کے بجائے صرف ملکی سیاسی فائدہ اٹھانے کی کوشش کریں گے۔‘‘

انہوں نے مزید لکھا، ’’مودی جی مسلسل بدامنی زدہ ریاست منی پور کا دورہ کرنے سے کیوں انکار کر رہے ہیں، جہاں کے لوگ مئی 2023 سے دکھ اور تکالیف سہنے پر مجبور ہیں اور مکمل طور پر ٹوٹ چکے ہیں؟ ان کا وہاں نہ جانا سمجھ سے بالاتر ہے۔ منی پور کے عوام یقینی طور پر وزیرِ اعظم کے ایسے دورے کے مستحق ہیں۔‘‘

انہوں نے آخر میں لکھا، ’’دورے کر رہے ہیں بھرپور، نہیں جا رہے منی پور!‘‘