تیز گیند باز محمد سمیع نے واپس آتے ہی مچا دیا تہلکہ، 4 وکٹ لے کر ’بارڈر-گواسکر ٹرافی‘ کا دروازہ کھٹکھٹایا

تقریباً 1 سال کے لمبے عرصے کے بعد محمد سمیع نے کرکٹ میدان پر دوبارہ واپسی کی ہے۔ انجری سے واپس آتے ہی سمیع نے میدان پر پھر سے تہلکہ مچا دیا۔ رنجی ٹرافی کے ایک میچ میں بنگال کی طرف سے کھیلتے ہوئے انہوں نے 4 بلے بازوں کو اپنا شکار بنایا۔ اس طرح انھوں نے بارڈر-گواسکر ٹرافی کا دروازہ بھی کھٹکھٹا دیا ہے۔ کرکٹ میدان میں ان کی واپسی کا سبھی کو بے صبری سے انتظار تھا۔ انہوں نے 19 اوور کی گیند بازی کر کے یہ ثابت کر دیا کہ وہ مکمل طور پر فٹ ہیں اور ہندوستانی ٹیم میں واپسی کرنے کے لیے پورے طور پر تیار ہیں۔

محمد سمیع نے اپنا آخری میچ تقریباً 1 سال قبل 19 نومبر 2023 کو ون ڈے ورلڈ کپ کے فائنل میں کھیلا تھا۔ ورلڈ کپ کے دوران ہی وہ انجری کے شکار ہو گئے تھے۔ تب سے وہ کرکٹ میدان سے دور واپسی کی تیاری میں مصروف تھے۔ ہندوستانی ٹیم میں واپسی سے قبل انہوں نے رنجی ٹرافی میں کھیلنے کا فیصلہ کیا، تاکہ وہ اپنی فٹنس ثابت کر سکیں۔ رنجی ٹرافی کے میچ میں انہوں نے بنگال کی طرف سے کھیلتے ہوئے اندور کے ہولکر اسٹیڈیم میں زبردست کھیل کا مظاہرہ کیا۔ انہوں نے اپنی 19 اوور کی گیند بازی میں 54 رن دے کر 4 کھلاڑیوں کو پویلین کی راہ دکھائی۔ اس دوران ان کی گیند بازی اکونومی 2.84 کی رہی۔

آسٹریلیا کے خلاف ون ڈے ورلڈ کپ کے فائنل میچ کے بعد سے ہی وہ ٹخنے کی انجری کی وجہ سے ٹیم سے باہر چل رہے تھے۔ اسی سال ان کے ٹخنے کی سرجری ہوئی تھی، صحت یابی کے دوران ہی ان کو گھٹنے میں سوجن اور سائیڈ اسٹرین جیسے مسائل کا سامنا کرنا پڑا۔ اس کی وجہ سے ان کو واپسی میں 1 سال کا وقت لگ گیا۔ محمد سمیع کو بارڈر-گواسکر ٹرافی کے لیے بھی ٹیم میں منتخب نہیں کیا گیا۔ اب جبکہ رنجی ٹرافی میں خود کو بہتر ثابت کرنے کا ان کے پاس بہترین موقع ہے، تو شروعات انھوں نے بہترین کر دی ہے۔ اب دیکھنے والی بات یہ ہوگی کہ آنے والے میچز میں خود کی فٹنس اور گیند بازی کو وہ کیسے ثابت کرتے ہیں۔ اگر محمد سمیع اپنی بہترین کارکردگی کو برقرار رکھتے ہیں، تو یقیناً انھیں بارڈر-گواسکر ٹرافی میں کھیلنے کے لیے بلایا جا سکتا ہے۔