بی جے پی اور کانگریس نے اپنے اراکین پارلیمنٹ کے لیے جاری کیا وہپ، 2 اپریل کو حاضر رہنے کی ہدایت

وقف ترمیمی بل 2024 کل یعنی 2 اپریل کو لوک سبھا میں پیش کیا جائے گا۔ اس سے عین قبل بی جے پی اور کانگریس دونوں ہی اہم پارٹیوں نے اپنے اپنے اراکین پارلیمنٹ کے لیے وہپ جاری کر دیا ہے۔ پہلے بی جے پی کی طرف سے وہپ جاری کیے جانے کی خبریں سامنے آئیں، اور پھر کانگریس نے بھی اپنے اراکین پارلیمنٹ کو وہپ جاری کر دیا۔

بی جے پی کی طرف سے 3 سطور کے جاری وہپ میں کہا گیا ہے کہ بدھ کے روز ایوان میں قانون سازی سے متعلق انتہائی اہم کام ہے۔ انھیں پاس کرنے کے لیے سبھی لوگ پارٹی کی حمایت کریں اور ووٹنگ کریں۔ وہپ میں بی جے پی نے اپنے سبھی اراکین پارلیمنٹ (جن کی تعداد 240 ہے) سے پورے دن ایوان میں ہی موجود رہنے کو کہا گیا ہے۔

کانگریس کی طرف سے بھی 3 سطور پر مبنی وہپ جاری کیا گیا ہے۔ اس میں سبھی اراکین پارلیمنٹ کو آئندہ 3 دنوں تک لوک سبھا اور اجیہ سبھا میں موجود رہنے کی ہدایت دی گئی ہے۔ اس وہپ سے اندازہ ہوتا ہے کہ اپوزیشن پارٹی کانگریس بھی کل کی کارروائی کے لیے اپنی طرف سے پوری طرح مضبوط ہونا چاہتی ہے۔ ذرائع کا کہنا ہے کہ وقف ترمیمی بل سے متعلق حکمت عملی پر گفتگو کے لیے آج شام اپوزیشن پارٹیوں کے اتحاد ’انڈیا‘ کے لیڈران کی میٹنگ بھی ہونے والی ہے۔ اس میں 2 اپریل کے لیے اسٹریٹجی تیار کی جا سکتی ہے۔