دہلی کیپٹلز کے نئے کپتان کا اعلان، کے ایل راہل کی جگہ اکشر پٹیل کو ملی ذمہ داری

نئی دہلی: انڈین پریمیئر لیگ (آئی پی ایل) 2025 کے آغاز سے قبل دہلی کیپٹلز نے اپنی ٹیم کے نئے کپتان کے نام کا اعلان کر دیا ہے۔ آل راؤنڈر اکشر پٹیل کو ٹیم کی قیادت سونپی گئی ہے، جبکہ کے ایل راہل، جنہیں 14 کروڑ روپے میں خریدا گیا تھا، کپتانی کی دوڑ میں پیچھے رہ گئے۔

اس سے قبل قیاس آرائیاں کی جا رہی تھیں کہ دہلی کیپٹلز کی قیادت کے ایل راہل کے سپرد کی جائے گی، لیکن فرنچائز نے اکشر پٹیل پر بھروسہ کیا۔ اکشر ٹی20 کرکٹ میں تجربہ رکھتے ہیں اور بڈودرا کی ٹیم کی قیادت کرتے ہوئے 16 میچوں میں سے 10 میں کامیابی حاصل کر چکے ہیں۔

اکشر پٹیل نے گزشتہ آئی پی ایل سیزن میں چنا سوامی اسٹیڈیم میں رائل چیلنجرز بنگلور (آر سی بی) کے خلاف دہلی کیپٹلز کی قیادت کی تھی، تاہم اس میچ میں ٹیم کو 47 رنز سے شکست کا سامنا کرنا پڑا تھا۔ بطور ٹی20 کپتان، اکشر نے 364 رنز بنائے ہیں، جس میں ان کا بہترین اسکور 57 رنز ہے جو انہوں نے گزشتہ سال آر سی بی کے خلاف بنایا تھا۔ انہوں نے 29.07 کی اوسط سے 13 وکٹیں بھی حاصل کی ہیں۔

کپتان مقرر ہونے کے بعد اکشر پٹیل نے کہا، ’’دہلی کیپٹلز کی قیادت کرنا میرے لیے اعزاز کی بات ہے۔ ٹیم اونرز اور سپورٹ اسٹاف کا شکریہ جنہوں نے مجھ پر اعتماد کیا۔ دہلی کیپٹلز کے ساتھ اپنے سفر میں میں نے بطور کھلاڑی اور انسان بہت کچھ سیکھا ہے اور اب قیادت کے لیے پوری طرح تیار ہوں۔‘‘

دہلی کیپٹلز کا مکمل اسکواڈ:

اکشر پٹیل (کپتان)، کلدیپ یادو، ٹرسٹن اسٹبز، ابھیشیک پورل، مچل اسٹارک، کے ایل راہل، جیک فریزر میکگرک، ٹی. نٹراجن، کرن نائر، سمیر رضوی، آشو توش شرما، موہت شرما، فاف ڈوپلیسی، مکیش کمار، درشن نالکنڈے، وپرج نگم، دُشمنتھا چمیرا، ڈونوون فریرا، اجے منڈل، مانونت کمار، ترپورانا وجے، مادھو تیواری۔