میکسیکو میں خوفناک سڑک حادثہ، ٹرک سے ٹکر کے بعد بس میں لگی شدید آگ، 41 زندگیاں جل کر خاک

میکسیکو سے خوفناک سڑک حادثہ پیش آیا ہے۔ اس حادثے میں تقریباً 41 لوگوں کی موت ہو گئی۔ 48 مسافروں سے بھری بس ہائی وے پر ایک ٹرک سے ٹکرا گئی جس کے بعد بس میں شدید آگ لگ گئی اور کچھ ہی دیر میں یہ جل کر خاک ہو گئی۔ بی بی سی کی رپورٹ کے مطابق بس کینکن سے ٹیبسکو کی طرف جا رہی تھی۔

حادثے کی تصدیق کرتے ہوئے ٹیبسکو کے کومل کالکو کے میئر اویڈیو پیرالٹا نے کہا ہے کہ یہ بس 48 لوگوں کو لے جا رہی تھی جو ایک ٹرک سے ٹکرانے کے بعد آگ کے شعلوں میں سما گئی۔ حادثے کے بعد کی کئی تصویریں بھی سامنے آئی ہیں جس سے پتہ چلتا ہے کہ یہ کتنا خوفناک منظر تھا۔ آگ کی زد میں آنے سے بس پوری طرح خاک ہو گئی، صرف دھات کے فریم ہی باقی بچے تھے۔

ذرائع کے مطابق اب تک 18 لاشوں کی تصدیق کر لی گئی ہے جبکہ کئی لاشیں ابھی بھی نہیں مل پا رہی ہیں۔ بس آپریٹر ٹورس ایکوسٹا کے فیس بک پر ایک پوسٹ میں اس حادثے میں ہلاک شدگان کے تئیں اظہار تعزیت کیا گیا ہے اور کہا گیا ہے کہ افسروں کے ساتھ مل کر یہ پتہ لگانے کی کوشش ہو رہی ہے کہ جب یہ حادثہ ہوا تب بس کی رفتار کتنی تھی۔ حادثہ کے قصوروار لوگوں کے خلاف کارروائی کی یقین دہانی کرانے کے ساتھ ہی متاثرین کو معاوضہ دینے کی بات بھی کہی گئی ہے۔

ایک رپورٹ کے مطابق زخمیوں نے بتایا ہے کہ آگ نے کچھ ہی لمحوں میں پوری بس کو اپنی زد میں لے لیا تھا۔ بس پگھلتی چلی گئی اور لوگوں کی چیخ و پکار ایک۔ایک کرکے خاموش ہوتی چلی گئی۔ کوئی انہیں بچانے کی ہمت بھی نہیں کر سکا اور 41 زندگیاں خاک ہو گئیں۔