فچ ریٹنگز نے بھی ہندوستان کو دیا جھٹکا، جی ڈی پی سے متعلق اندازہ کو 0.6 فیصد کیا ڈاؤن گریڈ

ہندوستان کی معیشت سے متعلق ایک بار پھر بری خبر سامنے آ رہی ہے۔ فچ ریٹنگز نے حال ہی میں مالی سال 25-2024 کے لیے ملک کی معاشی ترقی کے اندازے کو 0.6 فیصد ڈاؤن گریڈ یعنی کم کر دیا ہے۔ قبل میں فچ ریٹنگز نے ہندوستان کی معاشی شرح ترقی کا اندازہ 7.0 لگایا تھا، لیکن اب اسے کم کر کے 6.4 فیصد کر دیا ہے۔

قابل ذکر ہے کہ اس سے قبل اے ڈی بی نے ہندوستانی جی ڈی پی کی شرح ترقی میں تخفیف کا اعلان کیا تھا۔ اتنا ہی نہیں، آر بی آئی نے بھی حال ہی میں مالی سال 25-2024 کے لیے مکل کی معاشی ترقی کے اندازے کو 7.2 فیصد سے گھٹا کر 6.6 فیصد کیا ہے۔ فکر انگیز بات یہ ہے کہ ہندوستان میں جی ڈی پی جو کووڈ کے بعد تیزی سے بڑھی تھی، اس میں پھر سے گراوٹ دیکھنے کو مل رہی ہے۔

فچ ریٹنگز نے 25-2024 کے لیے جہاں ہندوستان کی جی ڈی پی 6.4 فیصد رہنے کا اندازہ لگایا ہے، وہیں مالی سال 26-2025 کے لیے یہ اندازہ 6.5 فیصد ہے۔ یہ دونوں ہی شرح ترقی مالی سال 24-2023 میں 8.2 فیصد سے بہت کم ہے۔ توجہ طلب یہ بھی ہے کہ مالی سال 25-2024 کی دوسری سہ ماہی میں ملک کی جی ڈی پی گر کر 5.4 فیصد پر آ گئی تھی جو 7 سہ ماہیوں میں سب سے کم ہے۔

قابل ذکر ہے کہ گولڈمین سیکس اور بارکلیز سمیت عالمی مالیاتی اداروں نے بھی اپنے ترقیاتی اندازوں کو کم کر دیا ہے۔ گولڈمین سیکس نے مارچ 2025 کو ختم ہونے والے مالی سال کے لیے اپنے اندازے کو 6.4 فیصد سے گھٹا کر 6 فیصد کر دیا۔ شرح ترقی میں یہ گراوٹ مرکز کی مودی حکومت کے لیے ایک بڑا چیلنج ہے۔