گوگل کروم کے صارفین کے لیے بڑی خوشخبری، ایک بہترین فیچر متعارف

گوگل کروم میں ایک نیا فیچر متعارف کرایا جا رہا ہے جس کا مقصد صارفین کو انٹرنیٹ پر محفوظ سرفنگ میں مدد فراہم کرنا ہے۔اسٹور ریویوز نامی یہ فیچر آرٹی فیشل انٹیلی جنس (اے آئی) ٹیکنالوجی کو استعمال کرکے آزادانہ ذرائع کے ریویوز کو اکٹھا کرکے ان کی سمری بناتا ہے، جس سے معلوم ہوتا ہے کہ کوئی ویب سائٹ کس حد تک قابل اعتبار ہے۔

اس فیچر کا مقصد کسی ویب سائٹ کی ساکھ کی تصدیق کے عمل کو سادہ بنانا ہے۔

یہ فیچر آن لائن شاپنگ اور سروسز کے حوالے سے صارفین کے لیے زیادہ مددگار ثابت ہوگا۔

اس فیچر کے تحت صارفین کے سامنے یوزر فیڈبیک کی سمری کو ڈسپلے کیا جائے گا۔

یہ ڈیٹا قابل اعتماد ریویو پلیٹ فارمز سے حاصل کیا جائے گا اور صارفین اصل ماخذ پر جاکر بھی تفصیلات تک رسائی حاصل کرسکیں گے۔

عام طور پر کسی ویب سائٹ سے خریداری یا اس سے حساس ڈیٹا شیئر کرنے سے قبل اس کی ساکھ کے بارے میں جاننے کے لیے صارفین کو کافی مشکلات کا سامنا ہوتا ہے۔

مگر اسٹور ریویوز سے یہ کام آسان ہو جائے گا اور صارفین فوری طور پر کسی ویب سائٹ کے قابل اعتبار ہونے کے بارے میں جان سکیں گے۔

یہ فیچر ابھی محدود صارفین کو دستیاب ہے اور امکان ہے کہ آنے والے ہفتوں میں اسے تمام افراد کے لیے متعارف کرا دیا جائے گا۔