معروف فلمکار شیام بینیگل کا 90 سال کی عمر میں انتقال، کانگریس صدر کھڑگے کا اظہارِ تعزیت

ہندوستان کے مشہور و معروف فلمساز شیام بینیگل کا پیر کے روز 90 سال کی عمر میں انتقال ہو گیا۔ بینیگل کی صاحبزادی پیا نے اس خبر کی تصدیق کی ہے۔ بینیگل نے شام 6.30 بجے ممبئی واقع واکہارٹ اسپتال میں آخری سانس لی۔ وہ 10 دن قبل 14 دسمبر کو ہی دوستوں کے ساتھ اپنا 90واں یومِ پیدائش منایا تھا۔ بینیگل کے پسماندگان میں ان کی بیوی نیرا بینیگل اور بیٹی ہیں۔

بینیگل کی بیٹی پیا بینیگل نے بتایا کہ انھیں گردہ کی سنگین بیماری کے سبب ممبئی کے واکہارٹ اسپتال میں داخل کرایا گیا تھا جہاں انھوں نے آخری سانس لی۔ انھوں نے کہا کہ ’’شیام بینیگل کا شام 6 بج کر 38 منٹ پر واکہارٹ اسپتال میں انتقال ہوا۔ وہ کئی سالوں سے گردے کے مرض میں مبتلا تھے۔‘‘ ان کی آخری رسومات کے وقت سے متعلق جانکاری بعد میں دی جائے گی۔

بالی ووڈ کی ایک عظیم ہستی کے انتقال کی خبر پر فلمی و سیاسی ہستیوں کا رد عمل آنا بھی شروع ہو گیا ہے۔ کانگریس صدر ملکارجن کھڑگے نے ’ایکس‘ پر کیے گئے ایک پوسٹ میں لکھا ہے کہ ’’لیجنڈری فلمساز شیام بینیگل کے انتقال سے ہمیں گہرا صدمہ ہوا ہے۔ وہ ہندوستانی سنیما کی ایک بلند پایہ شخصیت اور متوازی سنیما تحریک کے حقیقی علمبردار تھے۔‘‘ وہ مزید لکھتے ہیں کہ ’’آرٹ فارم میں ان کی زبردست شراکت، فکر انگیز کہانی کہنے اور سماجی مسائل کے ساتھ گہری وابستگی کے ذریعہ انھوں نے ایک انمٹ نقوش چھوڑے ہیں۔‘‘ کھڑگے نے ان کی کاوشوں سے متعلق تعریف کرتے ہوئے یہ بھی کہا کہ ’’ان کی تخلیقات جیسے ’بھارت، ایک کھوج‘ جو پنڈت نہرو کی ’دی ڈسکوری آف انڈیا‘ پر مبنی ہے، اور سیریز ’سمودھیان‘ جو کہ دستور ساز اسمبلی کے مباحثوں پر مبنی ہے، نوجوان سامعین کے لیے ایک قابل قدر حوالے ہیں۔‘‘

بینیگل کو نئے دور کی فلموں کے لیے یاد کیا جاتا ہے۔ بینیگل کو 1970 اور 1980 کی دہائی میں ’انکر‘، ’نشانت‘ اور ’منتھن‘ جیسی فلموں کے ذریعہ ہندوستانی فلم میں متوازی سنیما کی شروعات کرنے کا سہرا دیا جاتا ہے۔ ’بھومیکا‘، ’جنون‘، ’منڈی‘، ’سورج کا ساتواں گھوڑا‘، ’ممو‘ اور ’سرداری بیگم‘ کو ہندی سنیما میں ان کی آرٹ فلموں میں شمار کیا جاتا ہے۔ اپنے شاندار کیریئر میں بینیگل نے متنوع ایشوز پر فلموں کے علاوہ ڈاکیومنٹری اور ٹیلی ویژن سیریل بھی بنائے، جن میں ’بھارت ایک کھوج‘ اور ’سنویدھان‘ شامل ہیں۔

شیام بینیگل کو 1976 میں پدم شری اور 1991 میں پدم بھوشن کے اعزاز سے نوازا گیا تھا۔ 2007 میں انھیں ہندوستانی سنیما کے اعلیٰ اعزاز ’دادا صاحب فالکے ایوارڈ‘ سے نوازا گیا تھا۔ وہ تنہا فلم ہدایت کار تھے جنھوں نے بہترین ہندی فیچر فلم کے لیے 5 مرتبہ نیشنل فلم ایوارڈ جیتا۔ اس کے علاوہ انھیں 2012 میں ساؤتھ ایشین سنیما فاؤنڈیشن کے ’ایکسی لنس اِن سنیما ایوارڈ‘ سے بھی سرفراز کیا گیا۔ ان کو ہندوستانی فلم انڈسٹری میں قابل ذکر تعاون کے لیے یہ ایوارڈ لندن میں دیا گیا تھا۔