گزشتہ برس کے مقابلے میں اِمسال حج درخواستوں میں ریکارڈ اضافہ

اسلام آباد:

رواں سال حج کے لیے موصول درخواستوں کی تعداد میں گزشتہ برس کے مقابلے میں  ریکارڈ اضافہ ہوا ہے۔

حج اخراجات اقساط میں وصول  کرنے کے وزارت مذہبی امور کے فیصلے کے مثبت اثرات سامنے آ  گئے۔ گزشتہ برس کی نسبت رواں سال پہلے 2 روز میں حج درخواستیں جمع کروانے میں ریکارڈ اضافہ  ہوا ہے۔

دستاویز کے مطابق پہلے 2 روز میں مجموعی طور پر 4774 درخواستیں موصول ہوئیں۔ گزشتہ برس پہلے 2  دنوں میں 1300 جب کہ ابتدائی 10 دنوں میں 13 ہزار درخواستیں موصول ہوئی تھیں۔ ریگولر سرکاری حج اسکیم کے تحت 4734 درخواستیں جمع ہوئیں۔ بینکوں کو اسپانسرز شپ اسکیم کے تحت 40 درخواستیں موصول ہوئیں۔ 

واضح رہے کہ امسال سرکاری اسکیم کے تحت درخواست کے ساتھ 2 لاکھ روپے جمع کیے جارہے ہیں۔ قرعہ اندازی میں نام آنے پر 4 لاکھ، باقی رقم 10 فروری تک جمع کرانا ہوگی۔ سرکاری اسکیم کے لیے حج درخواستیں 3 دسمبر تک جمع کرائی جاسکتی ہیں۔ کوٹے سے زیادہ درخواستیں آنے پر ریگولر اسکیم کی قرعہ اندازی 6 دسمبر کو ہوگی۔

سرکاری کوٹے کی اسپانسرز شپ اسکیم پہلے آئیں پہلے پائیں کی بنیاد پر ہے۔ اسپانسرز شپ اسکیم کے لیے تمام رقم یکمشت ڈالروں میں جمع کرانا لازم ہے۔ گزشتہ برس حج درخواستیں کم آنے کے باعث درخواستیں جمع کروانے کے لیے 10 روز کی توسیع بھی دی گئی تھی۔