لاہور: امیر بالاج قتل کیس کے مرکزی ملزم گلشن تعریف عرف طیفی بٹ کے بہنوئی جاوید بٹ قتل کی سی سی ٹی وی فوٹیجز سامنے آگئی۔
پولیس ذرائع کے مطابق جاوید بٹ کی ٹارگٹ کلنگ میں کل 4 شوٹرز تھے جبکہ قتل کے لیے رکشے اور موٹر سائیکل کا استعمال کیا گیا۔
سی سی ٹی وی فوٹیجز میں دیکھا گیا کہ ہما بلاک میں جاوید بٹ کی رہائش گاہ کے باہر مین روڑ پر رکشہ کھڑا ہوا، مقتول اہلیہ کے ساتھ نکلا تو رکشے نے ریکی کی، موٹر سائیکل اور رکشہ جاوید بٹ کی گاڑی کے ساتھ ریکی کرتے آیا۔ ایف سی انڈر پاس کے قریب رکشے نے مقتول کی گاڑی روکی جبکہ موٹر سائیکل سوار شوٹر نے فائرنگ کی۔
فوٹیجز میں دیکھا گیا کہ موٹر سائیکل سوار بغیر ہیلمٹ جبکہ پیچھے بیٹھے شوٹر نے ہیلمٹ پہن رکھا تھا، فائرنگ کے بعد موٹر سائیکل سوار اتر کر رکشے میں بیٹھا جبکہ پیچھے ہیلمٹ پہن کر بیٹھا شوٹر موٹر سائیکل لے کر فرار ہوا۔
پولسی کے مطابق رکشے کی ملکیت اور تفصیلات بھی حاصل کر لی گئی ہیں، ملزمان نے رکشے سے موٹر سائیکل پر جگہ تبدیل کی۔ رکشہ اور موٹر سائیکل سوار ملزم فائرنگ کے بعد الگ الگ ہوگئے۔
پولیس کا کہنا ہے کہ ملزمان کی آخری لوکیشن ٹیمپل روڑ کی آئی جبکہ سیف سٹی کیمرے خرابی کے باعث تفتیش میں مشکل پیدا ہوئی، ملزمان کی متعدد سی سی ٹی وی فوٹیجز حاصل کر لی گئیں جنہیں جلد گرفتار کر لیا جائے گا۔